ߓߌ߬ ߛߌ߬ߣߌ߲߬ߟߏ߲ ߣߌ߲߬ ߛߐ߱ ߡߊ߬߸ ߡߎ߯ ߞߊ߲ ߠߋ߬ ߓߐ߫ ߘߊ߫ ߖߌ߬ߣߍ߫ ߓߌ߬ߛߊߥߏ߫ ߞߎߓߋߘߊ ߥߙߏ߬ߘߎ߰ ߞߌ߲ߘߊ ߘߏ߫ ߟߊ߫߸ ߣߊ߲߬ߕߌ߮ ߟߎ߬ ߣߌ߫ ߢߐ߲߯ ߕߍ߫، ߊߟߎ߫ ߦߴߊ߬ ߟߐ߲߫ ߡߎߣߎ߲߬߸ ߞߏ߫ ߞߎߣߎ߲߬ ߓߌߟߏ߲߸ ߓߌ߬ߛߊߥߏ߫ ߞߕߌߘߊ ߞߊ߬ ߞߎ߲߬ߠߊ߬ߛߌ߰ ߛߌ߲ߝߏ߲߫ ߝߌ߬ߟߊ߫ ߟߋ߬ ߡߊߞߟߌ߫ ߘߐ߬ߝߛߍ߬ߝߛߍ߬ߟߌ ߘߏ߫ ߞߊ߲ߡߊ߬߸ ߣߊߟߌ߬ߡߎ߲߫ ߛߐ߬ߘߐ߲ ߣߌ߫ ߣߊ߲߬ߝߟߏ߬ߦߊ߬ߟߌ ߞߏߕߌ߮ ߘߌ߫߸ ߛߎ߬ߟߋ߬ߡߊߣ ߛߋ߬ߦߌߘߌ߬߸ ߞߵߏ߬ ߟߊ߫ ߝߘߏ߬ߓߊ߬ ߞߏ߲߬ߘߏ߬ߘߊ ߞߟߊ߬ߕߌ߮ ߞߊ߲߬߸ ߏ߬ ߡߍ߲ ߕߐ߯ ߞߏ߫ ߊ߲ߕߏߣߌߦߏ ߡߐ߲ߕߋߙߏ߫، ߞߕߌߘߊ ߞߵߊ߬ߟߎ߬ ߡߊߞߟߌ߫߸ ߞߊ߬ ߓߊ߲߫ ߞߵߊ߬ߟߎ߫ ߓߌ߬ߟߊ߬ ߢߣߊߥߛߎ ߟߊ߫.
ߊ߬ ߦߌ߬ߘߊ߬ ߘߊ߫ ߞߕߌ ߞߏ߫ ߢߊߢߌߣߌ߲ߠߊ ߟߎ߬ ߓߟߏ߫߸ ߞߏ߫ ߊ߬ߟߎ߬ ߣߌ߫ ߞߏߟߊߕߍ߯ ߝߌ߬ߟߊ ߢߌ߲߬ ߠߎ߬ ߞߎߡߊ߫ ߘߊ߫ ߥߊߘߌ߫ ߞߏ ߘߏ߫ ߟߋ߬ ߞߊ߲߬، ߞߏ߫ ߘߟߊ߫ ߥߊߘߌ ߞߋ߲߬ߥߟߎ߬ ߕߊ߲߫ ߠߋ߬ ߟߊߓߐߣߍ߲߫ ߖߡߊ߬ߣߊ ߞߏ߲߬ߘߏ ߟߊ߫߸ ߡߍ߲ ߢߊߘߐߜߍ߫ ߛߌ߫ ߟߐ߲ߣߍ߲߫ ߕߍ߫، ߞߏ߫ ߊ߬ߟߎ߬ ߡߊߞߟߌߣߴߏ߬ ߟߋ ߘߐ߫߸ ߞߵߊ߬ߟߎ߬ ߘߐߝߛߍ߬ߝߛߍ߫ ߏ߬ ߞߏߢߊ ߡߊ߬، ߞߏ߫ ߊ߬ߟߎ߫ ߞߊ߬ ߕߎ߬ߡߊ߬ߙߋ߲߬ ߦߙߌߞߊ߫ ߟߋ߬ ߞߍ߫ ߏ߬ ߞߏ ߘߊߘߐߖߊߥߏ ߟߊ߫، ߞߏ߫ ߊ߬ߟߎ߫ ߞߏ߬ߣߌ߲ ߡߊ߫ ߛߐ߲߬ ߊ߬ ߞߏ ߟߊ߲ߞߣߍߡߊ߫ ߟߊ߫߸ ߞߵߏ߬ ߞߎ߲߭ ߞߍ߫ ߊ߬ߟߎ߬ ߟߊ߫ ߞߎ߲߬ߠߊ߬ߝߎߟߋ߲ ߓߊ߲ߓߊ߲ ߘߌ߫.
ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߞߏߕߌ߮ ߘߏ߲߬ ߡߊߞߟߌ߫ ߘߊ߫ ߟߋ߬ ߝߊ߬ߛߏ߬ ߜߙߊ ߟߊ߫ ߞߐ߬ߓߊ߬ߟߏ߲߫ ߕߊ߬ߡߌ߲߬ߣߍ߲߸ ߞߏ߫ ߊ߬ ߦߋ߫ ߥߊߘߌ ߣߌ߲߬ ߥߊ߫ ߦߌߟߊ߫ ߖߐ߲ߖߐ߲ ߝߐ߫، ߛߐ߲߬ ߞߍ߫ ߘߴߊ߬ ߡߊ߬ ߦߋ߲߬ ߝߛߊߦߌ߫߸ ߞߏ߫ ߥߘߌ ߥߊߣߍ߲߫ ߦߙߐ߫ ߞߟߊ߬ߟߡߊ߬ ߘߐ߫، ߓߊߏ߬߸ ߞߏ߫ ߊ߬ ߞߍߣߍ߲߫ ߘߎ߲߬ߘߎ߬ߡߊ߬ ߓߊ߯ߙߊ ߟߎ߬ ߟߋ߬ ߞߐߡߊߓߌ߲ߓߌ߲߫ ߝߋ߲ ߘߌ߫ ߝߊ߬ߛߏ ߞߣߐ߫.
ߒ߬ߓߊ߬߸ ߊ߬ߟߎ߫ ߡߌ߬ߘߊ ߡߍ߲ ߞߍ߫ ߘߊ߫ ߞߕߌߘߊ ߓߟߏ߫ ߣߌ߲߬ ߞߵߊ߬ߟߎ߬ ߘߊߕߎ߲߯߸ ߞߊ߲ߕߌ߯ߘߊ ߝߊ߬ߘߌ߬ ߞߣߐ߬ߜߍ߲߬ߘߋ߲ ߠߎ߬ ߥߊ߫ ߘߊ߫ ߞߏߕߌ߮ ߣߌ߫ ߞߟߊ߬ߕߌ߮ ߢߌ߲߬ ߠߎ߫ ߟߊߓߐ߫ ߂߂ߙߋ߲߀߀ ߡߊ߬߸ ߞߊ߬ ߕߊ߯ ߊ߬ߟߎ߬ ߘߌ߫ ߦߙߐ߫ ߘߐ߫߸ ߡߐ߰ ߡߊ߫ ߡߍ߲ ߦߙߐ߫ ߞߋߟߋ߲߫ ߟߐ߲߫، ߏ߬ ߟߋ ߞߐ ߘߐ߫ ߛߊ߫߸ ߊ߬ߟߎ߬ ߥߊ߫ ߘߴߊ߬ߟߎ߬ ߘߌ߫ ߞߟߍ߬ߘߋ߲߬ߓߏ߲ ߘߏ߫ ߞߣߐ߫ ߛߊ߲ߕߊ߫ ߟߎߖ߭ߊ߫ ߞߌ߲߬ߘߊ ߟߊ߫.
ߏ߬ ߞߍ߸ ߡߎ߯ ߞߊ߲ ߘߏ߫ ߟߎ߫ ߓߐ߫ ߘߊ߫ ߓߌ߬ ߛߎߓߊ߮ ߝߍ߬، ߓߊߏ߬߸ ߝߊ߲߬ߞߊ߬ ߓߟߏߡߊߞߊ߬ߣߍ߲ ߠߎ߬ ߣߐ߬ ߞߌ߬ߓߊ߬ߙߏ ߣߌ߲߬ ߡߍ߲߫ ߠߊ߫߸ ߏ߬ ߡߴߏ߬ ߟߎ߬ ߕߏ߫ ߛߌ߰ ߘߐ߫߸ ߊ߬ߟߎ߫ ߣߊ߬ ߘߊ߫ ߞߊ߲ߕߌ߯ߘߊ ߝߊ߬ߘߌ߬ ߞߣߐ߬ߜߍ߲ߘߋ߲ ߠߎ߬ ߞߊ߲ߡߊ߬߸ ߞߊ߬ ߡߎ߮ ߝߏߘߏ߲߫ ߢߐ߲߮ ߠߊ߫، ߏ߬ ߞߍ߫ ߘߴߊ߬ߟߎ߫ ߞߢߊ߬ߣߍ߲ ߞߐ ߟߋ߬ ߘߐ߫ ߢߐ߲߮ ߢߊߦߋ߫ ߟߊ߫ ߘߊߘߐߝߙߊߢߐ߲߯ߦߊ ߕߊ߫ ߓߟߏ ߡߊ߬.
ߝߐ߰ߓߍ߬ߦߊ߬ߟߊ ߘߏ߫ ߕߊ߫ ߝߐߟߌ߫ ߘߐ߫߸ ߞߏ߫ ߓߌ߬ ߛߐ߱ ߢߌ߲߬ ߠߋ߬ ߡߊ߬߸ ߊ߬ߟߎ߫ ߞߊ߬ ߛߘߋߦߊߥߏ ߟߊ߫ ߣߊ߲߬ߕߌ߮ ߟߎ߬ ߦߋ߫ ߛߏ߫ ߘߐߦߊ߯ߟߊ ߟߊ߫، ߡߎ߯ߕߋ ߣߌ߲߬ ߘߏ߲߬ ߞߍߣߍ߲߫ ߠߋ߬߸ ߞߵߊ߬ ߛߐ߬ߘߐ߲߬ ߖߌ߬ߣߍ߫ ߓߌ߬ߛߊߥߏ߫ ߞߊ߲ߕߌ߮ ߎߡߊߙߏ߫ ߛߌ߬ߛߏ߬ߞߏ߫ ߊ߲ߓߊߟߏ߫ ߦߋ߫ ߕߊ߯ߡߊ ߘߐ߫ ߘߎ߬ߓߊߦߌ߬، ߊ߬ ߥߊߣߍ߲߫ ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߟߊ߫ ߓߊ߲ߘߊߖߌߦߊ߫ ߞߏ ߜߊ߬ߙߊ ߂߈߲ ߠߋ߬ ߢߣߊߓߊ߯ߦߊ߫ ߞߊ߲ߡߊ߬ ߦߋ߲߬.
ߊ߲ߓߊߟߏ߫ ߛߎߘߊ߲߫ ߘߊ߫ ߂߀߁߉ ߟߋ߬ ߟߊ߫ ߞߊ߬ ߞߍ߫ ߞߊ߲ߕߌ߮ ߘߌ߫ ߛߊ߲߬ ߟߏ߯ߟߎ߫ ߟߐ߬ߒ߬ߞߋ߬ߟߊ ߞߊ߲ߡߊ߬، ߓߌ߬ߛߊߥߏ߬ ߖߌ߬ߣߍ߫ ߘߏ߲߬ ߦߋ߫ ߖߡߊ߬ߣߊ߫ ߟߋ߬ ߘߌ߫߸ ߡߍ߲ ߦߋ߫ ߟߏ߲߬ߓߏ߲߬ߟߊ߲߬ߓߊ߲ ߕߍߡߊ߬߸ ߞߊ߬ߦߌ߯ ߊ߬ߟߎ߬ ߟߊ߫ ߘߍ߲ߒߖߘߍߟߦߊ ߕߎ߬ߡߊ ߁߉߇߄ ߠߊ߫߸ ߊ߬ߟߎ߬ ߥߙߎߣߍߦߊ߫ ߘߊ߫ ߔߕߏ߬ߞߌ ߟߎ߬ ߟߋ߬ ߓߟߏ߫، ߤߊߟߌ߬ ߡߊ߲߬ߞߊ߲ ߘߏ߫ ߥߟߌ߬ ߘߊ߫ ߦߋ߲߬ ߂߀߂߂ ߞߏ߲ߞߏߜߍ ߟߊ߫.
ߟߊ߬ߞߙߐ߬ߛߟߌ߬ ߓߟߏ ߡߊ߬߸ ߊ߲ߓߊߟߏ߫ ߞߊ߬ ߞߟߍ߬ߕߌ߯ ߝߌ߬ߟߊ߫ ߓߌ߬ߟߊ߫ ߟߐ߬ߘߎ߮ ߘߏ߫ ߟߎ߫ ߘߐ߫ ߕߎߟߊߝߌ߲߬ ߕߊ߬ߡߌ߲߬ߣߍ߲ ߢߌ߲߬ ߠߊ߫، ߏ߬ ߝߟߐ ߟߋ߬ ߞߟߍ߬ߕߌ߯ ߕߏߡߊ ߖߊߛߌ߫ ߘߌ߫߸ ߊ߬ ߞߵߏ߬ ߟߋ ߓߌ߬ߟߊ߫ ߞߊ߲ߕߌ߯ߘߊ ߟߊ߬ߞߊ߲߬ߘߊ߬ߟߌ ߡߎ߰ߡߍ ߞߎ߲߬ߠߊ߫، ߞߊ߬ ߓߊ߲߫ ߞߊ߬ ߞߟߍ߬ߕߌ߯ ߤߐߙߑߕߊ߫ ߌ߲ߕߊ߬ ߓߌ߬ߟߊ߫ ߞߊ߲ߕߌ߮ ߖߍ߬ߘߍ ߟߊ߫ ߣߊ߲߬ߕߌ߰ ߘߊ߰ߘߐ߬ ߞߙߍߞߙߍߣߍ߲ ߞߎ߲߬ߠߊ߫، ߊ߬ ߘߏ߲߬ ߕߎ߲߬ ߓߘߊ߫ ߛߊ߲߬ ߕߊ߲߫ ߣߌ߫ ߞߐ߫ ߓߐ߫߸ ߦߟߍ߬ߡߊ߲߫ ߕߎ߲߬ ߡߊ߫ ߘߏ߲߬ ߗߋߘߊ߫ ߝߌ߬ߟߊ ߢߌ߲߬ ߠߎ߬ ߘߐ߫.
ߊ߲ߓߊߟߏ߫ ߘߏ߲߬ ߡߊ߫ ߦߟߍ߬ߡߊ߲߬ߠߌ߲ ߣߌ߲߬ ߞߍ߫ ߕߎ߬ߡߊ߬ ߛߌ߫ ߟߊ߫߸ ߝߏ߫ ߞߊ߬ߝߏ߬ ߖߊߛߏ߲ ߥߊ߬ߙߊ ߡߍ߲ ߞߍߣߍ߲߫ ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߖߡߊߣߊ ߟߎ߬ ߞߣߐ߫ ߕߋ߲߬، ߦߏ߫ ߜ߭ߊߓߐ߲߫ ߣߌ߫ ߖߋ߬ߟߌ߬ߓߊ߬ߘߎ߯ ߣߌ߫ ߡߊ߬ߟߌ ߣߌ߫ ߓߙߎߞߌߣߊ߫ ߝߊ߬ߛߏ߬ ߣߌ߫ ߖߌ߬ߣߍ߬ ߞߊ߲ߓߍ߲ ߖߡߊ߬ߣߊ ߟߎ߬، ߟߐ߯ ߕߊ߬ߡߌ߲߬ߣߍ߲ ߣߌ߲߬ ߘߏ߲߬ ߡߊ߬߸ ߘߏ߫ ߟߎ߫ ߝߣߊ߫ ߞߵߊ߬ߟߎ߬ ߡߊߝߟߍ߫ ߞߊ߬ߝߏ߬ ߖߊߛߏ߲ ߞߍ߫ ߟߊ߫ ߛߙߊ߬ߟߏ߲߫ ߖߡߊ߬ߣߊ ߞߣߐ߫.
ߟߏ߲ߞߊߛߌߦߊ߫ ߞߊ߬ߡߙߊ߬ ߓߟߏ߫