ߝߘߊ߬ߝߌ߲߬ߠߊ߫ ߕߟߋ߬ߓߋ߬ ߞߊߝߏ ߟߎ߬ ߟߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߍ߬ߓߊ (ߛߘߋߦߊߥߏ) ߘߊ߯ߘߐ ߞߎ߲߬ߕߌ߮ ߟߎ߬ ߟߊ߫ ߘߍ߬ߘߊ ߞߊ߬ ߟߊ߬ߘߍ ߡߍ߲ ߡߊߞߟߌ߫ ߊߓߎߖ߭ߊ߫ ߘߓߊ߬ߓߌߟߊ ߕߋ߬ߟߋ߫ ߀߂ ߡߊ߬߸ ߣߴߊ߬ ߞߊ߫ ߞߊ߲߫ ߞߊ߬ ߞߎ߲߭ߘߏ߲߬ ߛߌ߬ߣߌ߲߬ߟߏ߲ ߘߓߊ߬ߓߌߟߊ ߕߟߋ߬ ߀߄ ߡߊ߬߸ ߖߡߊ߬ߣߊ ߘߏ߫ ߟߎ߫ ߡߊ߫ ߛߐ߬ߘߐ߲߬ ߥߊߟߌ ߘߐ߫ ߝߋߎ߫. ߞߊ߬ߕߎ߲߯߸ ߊ߬ߟߎ߫ ߣߐ߬ ߞߊ߬ߛߙߋ ߡߍ߲ ߟߊ߫ ߟߊ߫ ߣߌߖ߭ߍߙ ߞߊ߬ߝߏ߬ ߖߊ߬ߛߏ߲߬ߠߊ ߟߎ߬ ߦߋ߫߸ ߏ߬ ߕߐ߭ ߡߊ߲߫ ߖߊ߲߬ ߡߎ߬ߕߎ߲߬߸ ߊ߬ߟߎ߬ ߥߊߣߍ߲߫ ߏ߬ ߟߋ ߢߐ߲߯ ߦߋ߫ ߞߊ߲ߡߊ߬߸ ߞߊ߬ ߞߍ߬ߟߍ ߝߊ߲߬ߝߘߊ ߡߊߗߍ߲߬߸ ߊ߬ ߣߌ߫ ߞߊ߬ ߞߎߡߊ߫ ߣߊ߲߬ߕߌ߰ ߟߊߕߊ߯ߕߊ ߟߎ߬ ߟߊߕߊ߯ ߢߊ ߞߊ߲߬. ߐ߲߸ ߟߊ߬ߘߍ ߏ߬ ߛߋ߲߭ߝߍ߬ ߊߓߎߖ߭ߊ߫߸ ߖߡߊ߬ߣߊ߬ ߘߊ߲ߘߐ߫ ߟߋ߬ ߘߊ߯ߘߐ߫ ߞߎ߲ߕߌ߮ ߟߎ߬ ߞߵߊ߬ ߢߣߊߓߊ߯ߦߊ߫ ߕߊ߲߬: ߣߌߖ߭ߋߙߌߦߊ߫߫߸ ߛߣߍ߬ߜ߭ߊߟߌ߫߸ ߕߜ߭ߏ߫߸ ߛߙߊ߬ߟߏ߲߫߸ ߓߋߣߍ߲߫߸ ߟߌߓߋߙߌߦߊ߫߸ ߞߊߔ ߝ߭ߍߙ߸ ߓߌ߬ߛߊߥߏ߫ ߖߌ߬ߣߍ߬߸ ߜ߭ߊ߯ߣߊ߬߸ ߜ߭ߊ߲ߓߌ߫߸ ߊ߬ ߣߌ߫ ߜߋ߲ߞߐ߰ߖߌ߬ߘߊ.
ߖߡߊ߬ߣߊ߬ ߘߊ߲ߘߐ߫ ߝߣߊ߫ ߓߍ߫߸ ߏ߬ ߟߎ߬ ߡߊ߫ ߥߊ߫߸ ߦߏ߫: ߣߌߖ߭ߍߙ߸ ߓߙߎߞߌߣߊ߫ ߝߊ߬ߛߏ߬߸ ߡߊ߬ߟߌ߸ ߊ߬ ߣߌ߫ ߖߌ߬ߣߍ߬ ߞߊ߲ߓߍ߲. ߒ ߘߏ߲߬ ߟߊߣߴߊ߬ ߟߊ߫߸ ߏ߬ ߟߎ߫ ߓߊ߲߬ ߞߎ߲ ߠߋ߬ ߕߊ߯ ߟߊ߫߸ ߓߊߏ߬ ߊ߬ߟߎ߬ ߣߌ߫ ߛߘߋߦߊߥߏ ߡߙߌߦߊ ߝߐߣߍ߲߫ ߠߋ߬ ߢߐ߲߮ ߞߐ߫ ߣߊ߲߬ߕߌ߮ ߟߎ߬ ߟߊߕߊ߯ ߞߏ ߘߐ߫ ߣߌߖ߭ߍߙ ߞߊ߬ߝߏ߬ ߖߊ߬ߛߏ߲߬ߠߊ ߟߎ߬ ߞߊ߲ߡߊ߬. ߏ߬ ߟߎ߬ ߡߍ߲ ߠߎ߬ ߣߐ߬ ߡߏ߬ߤߊ߬ߡߍ߬ߘ ߓߊߖ߭ߎߡ ߠߊߥߟߏ߫ ߟߊ߫ ߂߀߂߃ ߞߊ߬ߙߌ߬ߝߐ ߕߋ߬ߟߋ߫ ߂߆ ߡߊ߬ ߕߋ߲߬ ߘߏߦߌ߲߫.
ߌߞߏߡߌ߲߬ ߕߟߋ߬ ߛߓߊ߬ ߟߊߘߍ߫ ߟߋ߬߸ ߡߎߛߝߊ߬ ߞߙߌߛߑߕߏߝߋ߫ ߡߍ߲ ߦߋ߫ ߣߌߖ߭ߋߙߌߦߊ߫߫ ߘߊ߯ߘߐ ߞߎ߲߬ߠߊ߫߸ ߏ߬ ߞߊ߲߫ ߞߏ߫ ߤߊߟߌ߬ ߣߌ߫ ߟߊ߬ߘߍ ߓߊ߲߫ ߘߊ߲߫ ߞߊ߬ ߞߐ߲߰ ߖߎߡߊ ߢߍ߫߸ ߞߏ߫ ߊ߬ߟߎ߬ ߘߌ߫ ߛߋ߫ ߖߌ߰ ߟߊ߫ ߣߌߖ߭ߍߙ߸ ߞߊ߬ ߕߊ߯ ߣߊ߲߬ߕߌ߮ ߢߌ߲߬ ߠߎ߬ ߜߍ߲߫ ߞߘߎߞߘߎ߫.
ߣߌߖ߭ߍߙ ߡߙߊ߬ߓߊ߰ ߞߎߘߊ ߊߓߘߎߙߊߤߑߡߊߣ ߕߌߦߊߣߌ߫ ߞߊ߲߫ ߞߏ߫ ߊ߬ߟߎ߫ ߡߊ߬ߞߏ߬ ߕߍ߫ ߓߌ߲߬ߓߊ߬ߏ߬ ߛߌ߫ ߟߊ߫߸ ߊ߬ ߓߐ߫ ߘߊ߫ ߝߊ߲߬ ߛߌ߫ ߘߐ߫. ߊ߬ ߣߌ߫ ߝߣߊ߫߸ ߞߏ߫ ߊ߬ߟߎ߬ ߕߍ߫ ߣߌߖ߭ߍߙ ߡߊߓߊ߰ߓߊ߮ ߣߴߊ߬ ߡߊߛߌߟߊ߲ ߝߍ߬ ߢߊ߫ ߛߌ߫ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫